Snemma í síðustu viku var veðurspáin fyrir síðustu helgi orðin frekar léleg hvað hangskilyrði varðaði og fór það svo að ekki var hangfært alla helgina. Hins vegar leit spáin mjög vel út fyrir mánudaginn og má eiginlega segja að hún hafi batnað með hverjum deginu sem leið og bætti svo enn frekar í vindinn í dag!
Átta keppendur mættu á svæðið klárir í slaginn og þrír til viðbótar voru á hliðarlínunni með léttari vélar sem hefðu kannski sloppið til í talsvert minni vind. En þegar leikar hófust um kl. 18 var að slá alveg upp í 13 m/s en vindurinn var mikið í kringum 10 m/s og 15-30° á brekku en þegar leið á kvöldið fór vindurinn að snúa sér nær brekkunni og var í kringum 5-15° en á sama tíma datt hann aðeins niður og var nær 8 m/s.
Norðurbrekkan á Bleikisteinsháls er ekki sú skemmtilegasta hvað varðar beygjuna sem er ofar í hlíðinni þar sem uppstreymið þar er frekar veikt þannig að til að vera sem neðst í brekkunni þá var brautin einungis 80 metrar á lengd að þessu sinni.
En ráðsröðin var sem hér segir:
- Frímann*
- Erlingur
- Steinþór
- Rafn
- Böðvar
- Jón
- Guðjón
- Sverrir
*Hætti eftir fyrstu umferð
Úrslit urðu sem hér segir, áhugasamir geta skoðað nánari greiningu á vef F3XVault:
Með því að nota keppnistölvuna og vindmæli fæst nákvæm greining á öllum flugunum. Hvet menn til að skoða þetta, fara t.d. inn á hverja umferð fyrir sig (smella á Round X í hausnum) og skoða svo auka flipana sem eru með alls konar góðgæti, einnig smella á nafn flugmannanna.
Óskum við því Sverri kærlega til hamingju með sigurinn! Guðjón átti hraðasta flugið 58,74 sek í fyrstu umferð, Guðjón og Sverrir unnu svo tvær umferðir hvor og Rafn eina umferð.
Árni, Frímann og Stefán Sæm. stóðu svo vaktina í hliðunum með stakri prýði og kunnum við þeim bestu þakkir fyrir! Þökkum einnig þeim sem komu að horfa á og bjóðum Lúlla velkominn í hangklúbbinn en hann frumflug Sitar Special og tók sitt fyrsta hangs.
